SUN搞作:打橫嚟講:救港良方,必讀!
本人在此鄭重請求香港廢柴政府你班庸奴官員,唔該你哋放過我哋香港市民啦!拜吓你哋又點話!
你哋點樣至係「放過」我哋?
好簡單o架啫!你哋乜都唔使做!咁就得o架啦!
嗱!真的,係「乜都唔使做」!
報載,土共組織工聯會有意喺九龍城區「打造」一處「潮州一條街」,即係將有潮州特色嘅糧油雜貨店集中連結喺九龍城街市上蓋樓層,成為「潮州文化一條街」,發展為「旅遊景點」喎!前日,還請了商務及經濟發展局嘅蘇錦樑局長去當區潮式商舖「試食」添!
呢位在香港官場名不虛傳嘅廢中廢「蘇卡片」。
當有店東向佢呻捱貴租之時,蘇卡片竟叫店東自行想辦法「自救」囉!並反指同區內已有別家商戶轉型,又錄音機上身,「重播」在任何場合處境皆啱用的「萬能key」舊帶:「香港土地資源珍貴,要發揮創意、革新、有特色,才能發圍」之外,仲有段九唔搭八嘅經典金句:「仍有自我增值嘅空間」,各位看官,你明唔明佢噏乜春呢?
喂!各位愛國愛港嘅大姐大佬,若想香港唔死(唔好計要「香港好」嘞!),千祈唔好再提任何建議畀呢個爛狗廢柴政府,咁先至係「救港」呀!尤其是唔好跟「蘇卡片」有關的呀!有佢份處理的,未有一單唔「死無全屍」的!
唔該你哋留番啲時間畀佢清理佢嘅後事(蘇州屎)先啦!由電視牌照、港台新大樓、人對人直銷電話,到個人遊限額,甚至龍獅節的涉嫌貪污案,佢都未有交代和搞掂過呀!
九龍城市集好地地的,千祈千祈咪畀呢件廢物沾手弄臭呀!拜吓你哋啦!裝多兩炷香醒你又點話!過主過主!
彭志銘
次文化考古學家,對城中潮語有深入研究,博徵博引,廢官廢人行埋一邊。
歡迎add我facebook一齊(目及)實政府