城中鏡：金管局執位磨利幾張刀

雖然調來調去都依然屬於助理總裁ranking，唔算升職，但都要恭喜佢哋，因為做多幾個部門，等於磨利多幾張刀，儲夠幾張刀，有利升職嘛。呢幾個部門之中，「外事」最「好風水」，過往坐過呢個位嘅阮國恒同余偉文都已經升咗做副總裁，梁鳳儀仲上到副局長level，連依家金管局總裁陳德霖都曾經做過外事部助理總裁。

金管局話人事調動好正常，同事做唔同職位可以見識多啲唔同嘢，對職途有幫助。

今次除咗執位，金管局個架構都有變動。以前副總裁余偉文管晒「外事」、「儲備管理」同「機構拓展及營運」三個部門，儲備管理亦即係睇外匯基金。唔知係咪考慮到外匯基金做多咗另類投資，合規相關嘅工作量又大增，依家最新安排係陳總幫手睇「機構拓展及營運」，等余總可以專心搞「外事」同「儲備管理」。