政壇：搞搞政：林大輝選立會先要睇政改
其實立法會工業界（第二）議員林大輝（大輝）有意於一六年立會選舉轉戰直選嘅消息，喺政界已經係公開嘅秘密，近年仲同代表工商界嘅富貴黨「行得好埋」，該黨現任新界東議員田北俊仲打晒開口牌，對外放風話願意排新界名單第二位幫大輝「抬轎」，保送佢入立會。之不過大輝一直對係咪正式入黨都唔肯正面表態，直至尋日同傳媒聚會時，佢更突然將政改同自己嘅前途綑綁埋一齊，事前認真估佢唔到。
設計圖片及對白
大輝最新說法係要睇下政改係咪通過，先決定選唔選下屆立會，理由係如果通過政改嘅政治生態一定會唔同，到時就會諗下用邊個平台發聲，到時富貴黨係其中一個機會；至於留守功能界別參選就唔係首選；如果一旦政改唔通過，大輝話分分鐘會揀唔玩，因為政改被否決意味立法會局面同過往一樣，到時一定覺得意興闌珊，所以寧願唔玩好過。
形容否決政改如斬手腳
有知情人士透露，大輝依家舉棋不定，底因係富貴黨嘅前路未明朗，如下屆立會選舉時，操盤人完全當富貴黨係透明，換言之無有關方面嘅「祝福」，咁大輝入黨未必可以達到雙贏，所以都係睇定啲先落注。
或者大輝都心郁郁想繼續議會生涯，佢尋日公開呼籲泛民切勿杯葛政改，反而應該利用泛民手上選票，向未來特首候選人「討價還價」，咁先發揮到最大作用，又形容否決政改同「斬晒手手腳腳」無乜分別。
