政壇：顧紀筠設計新制服回饋建行亞洲

建行亞洲尋日舉行發布會，八個80後分行職員換上新制服後行catwalk好醒神，但估都估唔到，佢哋最後同場加映着制服跳熱舞，背景音樂仲要係disco版「龍的傳人」，真係相當有趣！事實證明，着西裝、A字裙都唔一定變機械人，只要設計得宜，銀行職員都可以跳到十字步，真係相當有創意！

其實呢八個分行職員只係練習咗兩三個禮拜，就已經跳得有板有眼。建行亞洲常務副行長Miranda郭珮芳就話，佢哋係公司精心挑選出嚟表演，事關好多員工都對今次表演好有興趣，報咗名都要揀過先有得跳！

Miranda就話自己都好鍾意套制服，原來舊嗰套已經着咗三年，都係時候換下款。佢仲講咗一個小秘密，原來女裝制服條A字裙係橡筋頭，所以跳舞都無問題！

顧紀筠話自己一向係呢間銀行嘅客戶，銀行幫佢賺咗唔少錢，所以將今次設計當係回饋對方。另外，佢透露啱啱榮升做婆婆，更笑言一個月大嘅孫女每日都學懂做唔同嘅事。