失蹤多時嘅貪曾尋晚出席酒會，進場時拒絕回應記者提問。
全國人大常委會就香港特首普選設下框架，激起各界回響。香港政制去到呢個關鍵時刻，連自○五年「腳痛」下台後，就絕口不談政治嘅前特首董建華，早前都破例出聲力撐人大決定，苦口婆心咁呼籲泛民議員支持政改。但偏偏另一前特首、綽號「貪曾」嘅曾蔭權爵士，就至今都冇為政改講過半句說話。尋日佢出席一個酒會時，又掛住敬酒寒暄，尸位素餐，繼續避談政改。
貪曾上台時不時眈天望地，唔知係咪憂心緊廉署幾時會做嘢拉佢。
香港中華總商會尋晚喺中環大會堂一間酒樓舉辦酒會，失蹤多時嘅貪曾亦有到場，係佢喺人大決定後首次現身公開場合。記者見到佢，當然立即上前追問佢點睇政改問題？有冇將○五年政改箍票失敗經驗話番畀現屆政府聽？但貪曾就十問九唔應，一味笑笑口就快閃入咗場。
到台上祝酒環節，一眾嘉賓都莊嚴肅立，唯獨係貪曾一人不時眈天望地，好明顯冇聽緊致辭嘉賓講嘢，唔知佢係咪憂心緊廉政公署幾時會做嘢拉佢，令佢再冇機會出席類似場合呢？完場離開時，記者再次追問貪曾有關政改嘅問題，以及廉署嘅調查進度等，貪曾都係充耳不聞，一邊耍手、一邊喺G4警員護送下鬆人，完全將自己置身事外，認真不負責任。
第一手消息請下載on.cc東網
