設計圖片及對白
由泛民各政黨組成嘅「飯盒會」今日換屆，做咗一年召集人嘅民協KK馮檢基終於退下火線，由公文袋「袋巾傑」梁家傑接任。KK尋日同傳媒茶敍，分享一年來嘅點點滴滴，不過唔知佢係咪做召集人做到情緒高漲，佢竟然呼籲泛民考慮組成聯盟甚至合併。
憂心邀方國珊入泛民「害咗佢」
吓？之但係泛民各黨由政治理念到政策取向都係南轅北轍，內訌不斷，要統一真係咁容易？但KK話泛民政黨雖然周不時各自為政，但經歷今年嘅政改爭議後，佢發現泛民之間其實可以非常團結，所以如果泛民想喺有普選後成為執政黨，各黨可以考慮先組成聯盟，喺時機成熟時合併成為單一政黨，挑戰建制派出選特首。佢又話，雖然要泛民各黨喺短期內合併並唔可能，但就以英國工黨為例，佢哋由組成聯盟到成為執政黨足足用咗五十年時間，覺得既然英國做到，香港都有機會做到咁話。
喺咪是但噏o架？咁KK會唔會帶頭邀請各黨討論合併嘅可能性呢？KK可能都知道自己嘅建議唔係咁可行，話民協喺泛民政黨中可謂實力最弱，相信無乜人會睬佢，睇嚟佢都有啲自知之明。佢又話做咗召集人一年，最大得着係同其他泛民議員熟落咗唔少，事關佢唔做召集人嗰陣因為要去做gym而好少開會，同其他議員都無乜兩句，但呢一年嚟要密密同大家開會，令佢多咗機會同唔同泛民議員傾偈。
外界近來盛傳西貢區議員「哪吒」方國珊會加入民協，KK話兩人喺地區政策層面上合作無間，但雙方就無傾過入黨呢個議題，又講笑話對方之前係建制派一分子，依家突然叫佢加入泛民擔心會「害咗佢」，又話自己唔鍾意同人因選舉而結合，唔會強迫對方入黨喎！
第一手消息請下載on.cc東網
