政改爭議不斷擴大，有團體發動中學生罷課，以示反對人大在政改框架設限。有許些組織聲稱代表學界而斷言罷課是錯，對此我們同事都認為「得啖笑」。
「好似我哋啲仔，連『拉布』都當係真係拉一塊塊嘅布，又點會對政治好奇而跟風罷課？對政治好奇得嗰啲，即係肯用腦啦？點會盲目跟風？」我笑道。
「況且，真係無心向學嘅學生，唔使等罷課佢都自己走堂啦，邊啲真係為『公義』罷課邊啲博懵我哋會唔知？」Miss Chan附和。
「其實依家啲學生好多都識諗。」繆Sir續道：「正正因為佢哋單純，對是非黑白的判斷往往比大人清晰，唔似得大人咁計算利害而模糊咗道德觀。」
蔡老師同意繆Sir的講法：「如果學生為表示立場，而喺理性、非盲從下決定罷課與否，本來就係公民意識覺醒。有此等學生，我哋應該欣慰。」
事實上，不少教育同工都認為，即使真的爆發罷課潮，我們依然緊守崗位，不偏不倚教導學生，不讓學生盲目從眾、不單憑罷課這行為而斷定他們犯錯。各位組織代表，我不會說你們沒代表性，但至少你們不代表我們幾個。
第一手消息請下載on.cc東網80後miss Siu
