零售業前景堪憂 業主仍飛擒大咬
提起個人遊，香港人可以講係又愛又恨。內地旅客蜂擁而至，固然可以促進經濟，但亦衍生唔少問題，除咗激化中港矛盾，更令商舖租金不斷飆升，就算近排零售業市況麻麻，舖租一樣逆市乾升，搞到小商戶冇啖好食，叫苦連天。
呢，港府早排出口術，話有意檢討個人遊政策，點知話口未完，內地旅客增長放緩，加上消費模式轉變，導致零售業銷售額連跌五個月，有人仲警告「嚴冬將至」添。但奇怪嘅係，喺零售業吹淡風嘅情況下，商舖業主仍然飛擒大咬，繼續大幅加租，搞到唔少商戶被迫遷舖甚至結業，吉舖愈來愈多。
本報記者去上水及元朗睇過，發現吉舖林立，小商戶就算唔執笠，亦只能苦苦經營。有間喺上水經營超過三十年嘅水電工程店，本來月租兩萬，業主獅子開大口，新約加租九倍，去到每月二十萬，你話點頂吖？元朗嘅情況亦差唔多，有經營超過三十年嘅粉麵店，因為業主加租近七成，計過條數根本冇得做，惟有結業，一走了之。
區內地產代理承認，近月雖然部分二線位置吉舖增多，但由於一線商舖租金平均每年升幅達兩成，業主睇好前景，企硬唔減，大部分商舖租金不跌反升。
零售業不景，舖租一枝獨秀，兩者背道而馳，簡直匪夷所思。正如有學者話齋，內地旅客同水貨客不斷增加，導致商舖租金幾年內狂飆，衍生商舖單一化嘅現象，傳統街坊舖紛紛結業，由財大氣粗嘅連鎖店、藥房同化妝品店取而代之，為區內居民生活帶來不便，導致怨聲載道。
講起商舖單一化，又點止上水同元朗吖。自從推出個人遊以來，本港珠寶店、藥房同化妝品店遍地開花，「梗有一間喺左近」，而傳統商戶就買少見少。呢，理工大學調查發現，超過八成受訪者認為珠寶首飾及手錶店過於氾濫；七成三人認同化妝品及個人護理用品店數目過多；超過六成半人認為個人遊推高商舖租金，令做街坊生意嘅小店被迫搬遷或結業。
好明顯，個人遊有辣有唔辣，令香港受惠唔少，亦帶來問題多多，話到尾都係因為港府議而不決，蹉跎歲月。隨着內地旅客不斷增加，由開放個人遊之初嘅每年幾百萬人增至舊年嘅四千幾萬人，本港旅遊配套設施不足嘅問題早就出現，點知當局無動於衷，一味吃老本，接待能力爆煲咯喎，唔出問題至奇喇。
工欲善其事，必先利其器。港府與其檢討個人遊，不如先檢討自己仲實際喇，叮！
