政壇：搞搞政：無溝通亂搞歧視例 中小企鬧爆周一鑊
平等機會委員會早前展開歧視條例「四合一」檢討諮詢，唔少人質疑諮詢文件係「魔鬼在細節中」，惹嚟多方批評。由於諮詢包括將事實婚姻，即係兩個人無結婚但又好似夫婦咁生活嘅關係，都納入為歧視保障範圍，有政黨尋日就聯同九個中小企商會召開記者會，怒插平機會主席「周一鑊」周一嶽。
設計圖片及對白
有中企商會直指事實婚姻難以界定，咁樣係變相要僱主認同同性或異性同居，當中僱主為僱員及其家屬提供嘅醫療等福利，唔知要增加幾多。香港中小企經貿促進會會長張川煌話：「個個都同居得，咁婚姻法要嚟做乜?」要求平機會收番條例。香港中小企業工商聯合會主席曾南更話：「無啦啦無結婚，就可以攞僱主利益，好慘！」
諮詢又建議僱主除要控制僱員唔歧視，仲要規管顧客行為。香港大中華中小企業商會創會會長雲海洪話，如果店員招呼不周、店內有同性戀嗌交但處理得唔好、甚至唔整蛋糕畀同性戀者，隨時都會被人告。會上播出去年周一鑊嘅錄音回應，周一鑊er咗幾er後，先話唔幫同性戀者整蛋糕有可能違反條例，仲叫「一係你摺埋」添，所以班中小企唔氣頂就假嘞！
斥如「閂埋門唱歌」
雲海洪仲質疑周一鑊「自己閂門唱首歌」，一直都冇同中小企溝通，又質疑平機會權力過分擴張，要政府檢討吓。捍衞家庭價值大聯盟召集人吳志堅就質疑周一鑊「偷雞摸狗」，趁暑期好多人外遊期間做諮詢，又漠視中小企同市民意見，對影響營商環境掩耳盜鈴，「佢係咪要將自己大愛，要大家幫佢找數？」吳直指佢嚴重失信，擘大眼講大話，「點做主席？」
