政壇：梁君彥呻阿仔掛住公職
香港菁英會尋晚舉行第七屆執委會就職禮，政商名人紛到賀。立法會議員梁君彥兒子梁宏正再冧莊做主席，爸爸當然戥佢開心，笑言對兒子表現相當滿意，但話口未完就呻兩句話：「佢掛住做公職，無乜時間做生意」，莫非梁君彥單打獨鬥做到索晒氣？
梁宏正（右一）同林凱章（左一）瞓身籌備菁英會就職禮，梁父梁君彥（右二）同林父林健鋒齊現身支持。
晚宴籌委會主席Victor林凱章都獲爸爸林健鋒到場做啦啦隊。Victor通宵達旦做準備，雙眼紅晒，爸爸睇見好肉赤，連忙讚賞兒子「大個仔了」，做事井井有條，接掌家族的玩具生意後，更做得有聲有色。雖然獲爸爸點名力讚，但Victor未敢飄飄然。問佢爸爸有乜缺點，佢露出鬼馬笑容話：「有都唔敢講啦，何況係乜？」
