政壇：星展CEO家庭日齊玩

銀行家工作喺好多人心目中都係一個謎，小朋友問嗲哋媽咪返工有乜搞作，解釋到口乾，小朋友都仲未明，結果星展香港搞咗個嘉年華，小朋友着住銀行制服落場示範做「賓架」，CEO龐華毅（Sebastian）帶埋靚太同兩個囝囝玩埋一份。

龐華毅單手抱住好盞鬼嘅細B，同隔籬靚到爆嘅老婆同大B笑到鬼咁開心，羨煞旁人。

個遊戲係咁嘅，嘉年華入面有一間迷你分行，小賓架負責出納，有客人拎住本存摺嚟就要扱印，跟住提錢畀客人（當然係假錢），啲錢之後可以用嚟換禮物。雖然龐華毅囝囝冇着制服，但都玩到we嘩鬼叫，場入面仲有魔術師、小丑，又可以跳跳吹氣城堡、吃即製爆谷、棉花糖，氹到小朋友開心晒。

星展香港奉行「5@5」政策，即係「星期五放五點」，今年主題係Kids@work，尋日兩點鐘開始已有員工可以同囝囝玩，龐華毅話希望畀仔女感受吓銀行工作環境同氣氛，仲可以加強親子溝通。