政壇：王秀琳從商諗頭多多
王秀琳Mango近年轉營搞飲食生意，近日佢就將其日本餐廳裝修變為日式居酒屋，仲提供骰盅等小玩意，佢話：「我哋想做到真係好似日本咁，日本人放咗工就最鍾意同朋友去居酒屋飲嘢食飯，而且普通日本餐廳太多，我哋想有特色啲！」佢強調已離開咗娛樂圈，依家想專注發展生意，佢又話：「我嚟緊想做啲設計嘅嘢，會係睡房用品，我有朋友係做廠可以幫手，我就負責設計，我想做多啲唔同嘅嘢，等自己有唔同嘅生意經驗！」
王秀琳（Mango）
係咪唔再留戀五光十色嘅娛樂圈？佢諗咗一諗就話：「其實一直有公司想簽我，唱歌同拍戲都有，但我以前已經做夠，同埋如果畀我揀，我寧願冇入過行，因為入行帶畀我好多唔方便，我出街都好冇安全感，成日覺得有記者跟蹤我，變得好神經過敏！」仍然單身嘅佢坦言跟男士約會都有壓力：「有啲發展緊都會嚇親，因為依家狗仔隊真係無處不在。」
