政壇：猛人爭做廠商會會董
中華廠商聯合會今年換屆，早前會長之爭已率先掀起種票疑雲，以及副會長顏吳餘英臨時縮沙退選等風波，最後由話咗唔選又選嘅副會長陳淑玲，同另一副會長李秀恒二揀一產生。近期爭選會長風波似乎平靜咗，查實依然波濤暗湧。被視為會長爭霸前哨戰嘅會董選舉已進入戲肉，聽聞今次共有一百三十幾人參選會董，但會董得一百個位，競爭相當激烈。其中有唔少大家熟悉嘅政商界名人無啦啦加入做會員之餘，仲爭埋會董位，唔通貪做廠佬開心啲？
設計圖片及對白
其中以廣東社團總會前主席KK王國強同「帽后」、飛達帽業副主席兼行政總裁顏寶玲，最令廠商會中人感到意外。KK係以承包工程為主嘅金城營造主席，同廠商點計都大纜扯唔埋。至於飛達號稱係全球最大帽子生產商，廠房遍布世界各地，員工數以萬計，規模咁大，梗係非一般廠商咁簡單啦。
王國強話淡出又入紙
雖然廠商會早年修改咗章程，連金融服務業都可加入做會員，但係呢兩位縱橫政商界嘅資深大哥、大姐級人士，突然「屈身」廠商會爭做會董，實在令人費解，唔通真係貪做廠佬一分子咩！尤其係KK啱啱卸任廣東社團總會主席，聲稱淡出前線，九月仲會重返校園讀書，話口未完又靜雞雞入紙競逐會董，最惹人猜疑。我哋問過佢點解突然鍾情廠商會？KK輕描淡寫話：「有次同朋友食飯講開，佢哋話不如一齊入紙選會董，我咪選囉！」咁信心有幾大？佢聽罷笑而不答。
聽聞今次尋求連任嘅會董有九十幾個，即係話將有三十幾人落選，睇嚟呢場拗手瓜賽一啲都唔輕鬆。一百位會董係由三千幾名會員投票選出，然後再由會董選出會長，所以唔難想像點解會董咁多人想做。聽講有人建議增加會董席位，但係仍未取得會內人士共識。
除上述兩名資深名人外，亦有唔少後生面孔競逐，包括立法會議員林健鋒嘅囝囝林凱章、顏吳餘英兩位千金顏明潤同顏明秀。聽聞林健鋒做副主席嘅經民聯將下一屆立法會廠商會代表席位視為囊中物，唔知林凱章想升呢做會董，係咪為步入政壇做準備呢？
