冧樹殺人不可再 護樹立法不容拖

發展局署任首席助理秘書長尋日就事件解畫，佢唔係老實認錯，而係繼續帶市民遊花園，繼續推卸責任，話涉事樹木倒冧前當局未收過相關投訴，目測又冇發現有危險；又話樹木辦人員如果發現私人土地樹木狀況唔掂，亦會通知業主改善，總之自己工夫做到加零一，冧樹殺人同佢哋無關咁話，簡直冷血到冇朋友。

不過，講到立法規管樹木安全，呢位高官就話會持「開放審慎」態度，但要「考慮市場人手配套問題」，其實等於承認本港有訂立樹木法嘅必要，間接為立法一拖再拖出唔到台認衰。唔認唔認還需認，早知今日，當初何必死撐吖！

冇錯，呢次慘劇的而且確發生喺私人地方，但唔等於港府可以側側膊，無論私地定官地，都係香港嘅地，官員食納稅人俸祿，點可以事不關己，一有事就將責任推得一乾二淨o架。

按照現行法例，七○年前落成嘅舊契屋苑，唔受保養樹木條款規管，地政總署如果發現樹木有問題，只會向業主發出警告信，要求加強管理，然後就關人個關。就算對方話之你乜都唔做，當局亦吹唔脹。仲有吖，由於現行法例過時兼寬鬆，多數業主立案法團以價低者得方式請人修葺樹木，求求其其，過咗海就係神仙，唔出事至奇喇。

講嚟講去，其實一字咁淺，只有就保障樹木安全立法，令有關人等孭起冧樹事故責任，都市安全隱患至可以消除。弊在港產官僚唔踢唔郁，立法一拖再拖，放任呢啲隨時從天而降嘅「兇器」威脅市民安全，咁搞法唔止失職，直頭係草菅人命。

樹木安全關乎市民安危，立法規管本來就係當局嘅分內事。高官都話喇，樹木辦主要工作係釐定樹木管理政策，及監察政府樹木管理工作等，立法係制訂政策嘅一部分，當局責無旁貸，如果以人手不足為由，繼續一拖再拖，最終又係不了了之，等於搵市民生命安全較飛。

其實，只要法例完善，有法必執，執法必嚴，消除安全隱患完全有可能。好似僭建招牌同消防隱患咁，就算喺私人物業內，當局都有權責令業主整改。所以話，樹木安全立法本身冇難度，最大嘅難度係港產官僚又懶又冇承擔，非不能也，實不為也。

太一叮都係嗰句，樹木病咗唔緊要，及時治理就掂，最惡搞嘅其實係得咗懶政病，連樹木都管唔好嘅港產官僚，叮！