「乳」沒有潮乳不潮乳，但「貧乳」就肯定係一個潮語。「貧乳」嘅「乳」，即係指女性嘅胸部，學名「乳房」。為初生嬰兒提供母乳，係哺乳類動物嘅本能。當然，人類嘅「乳房」也有其他嘅功用，例如中央電視台女主播們嘅乳房，傳聞係用嚟供給領導研究工作表現。又例如好多演藝界或模嘅胸部，大部分時間都係為宅男麻甩們提供幻想。「貧乳」嘅意思並唔係指貧窮人士嘅乳房，而係指某某人嘅胸部扁平，港式粵語稱之謂「飛機場」，或者潮啲講即係「微波」。「貧乳」喺其他華文地區廣泛使用，一般胸部平坦女性，都可稱為「貧乳女」。

身體髮膚，受諸父母，呢句嘢自小老爸就教我。所以無論玩乜都好，都要小心受傷，身體係用嚟愛惜嘅，不過都係知易行難，年紀漸長，虛耗過度，百病自然叢生。每一個人生來體質不同，外形高矮肥瘦亦然。好在，我係一個男性，亦唔係靠樣搵食，唔靚仔都唔使整容。但係，如果係女仔咁又唔同。唔知幾時開始，整容成為咗流行嘅事。二十幾年前，整容喺香港依然係一件不可告人同埋會被人非議嘅事。整過容嘅人多數係女士，係會被人指指點點，被人話成個人都係假，連帶人格都會被指有問題。時至今日，整容已經變得相當普遍。多得大台各線男女星，個個為求出位上位，歌星藝人們夢想大紅大紫，好多都走去整容。大家只要睇吓啲二三線姐仔，幾年前同幾年後，完全係兩個樣。同時，亦要多得東南亞國家，尤其係韓國嘅整形技術大躍進，以至令整容普及。美貌都可以大量複製同生產，「貧乳」都變成「暴乳」！

最近呢個潮語，傳入咗香港，不過又唔完全係有貶意，因為有好多好年輕但身材高挑長腿嘅「貧乳」女，其實亦都可以成為女神。正所謂：知足者、貧亦樂。人活得自然係最開心。大未必佳，小亦可喜，毋須咁刻意去取悅別人，因為僭建呢種行為，絕對騙案嘅一種，認仲好啲，唔認嗰啲，老實講……真係好乞人憎！

第一手消息請下載on.cc東網iPhone/iPad/Android/Windows Phone Apps