政壇：搞搞政：元秋一舊雲花名洗唔甩
唔少立法會議員都畀人改咗勁爆嘅花名，譬如建制嘅蔣麗芸（Ann）甫出道就憑「獅吼功」名震政壇，隨即被冠以「政壇元秋」稱號。而另一「瘋雲」人物，就要數經常同阿Ann針鋒相對嘅泛民黃碧雲，佢嘅「一舊雲」稱號同樣深入民心，據聞佢對呢個花名唔係好受落，無奈洗唔甩呢個名。
設計圖片及對白
一舊雲明明有英文名叫Helena，但前年上任冇耐就因為撳錯掣投錯票，變相放生涉嫌偷步賣樓嘅時任行政會議成員林奮強，據知，一舊雲唔多鍾意個花名，佢所屬政黨內部都有討論過係咪應該為一舊雲改番個新朵，有人仲提過，既然一舊雲身兼立法會食物安全及環境衞生事務委員會主席，成日評論政府驗菜、驗肉咁，不如學經典超市廣告人物叫「黃老太」啦！可惜一舊雲嫌個名老，唔肯叫自己做「老太」而擱置。
市民受落焗住硬啃
正所謂，花名入咗腦，要改真苦惱，好似一舊雲嘅黨友何俊仁，「鐵頭仁」變咗「AV仁」，到佢唔鍾意咩？梁美芬個「鼠王芬」嘅名亦一樣。或者，佢哋應該學吓阿Ann，據知，阿Ann起初都唔多鍾意「元秋」呢個外號，但當市民受落時，都唔輪到佢唔接受，甚至愛上呢個稱號。
