設計圖片及對白
近兩年立法會「拉布」可謂家常便飯，而「拉布」議員為求拖得就拖，不時會嗌主席響鐘點算開會法定人數，好似五月時，激進議員就財政預算案撥款拉布，開會八個鐘，議員因為點算人數、等開會都用咗唔止兩個鐘，佢哋嘥時間，秘書處仲淒涼，要唔停咁按照在席議員剔人頭、點人數，眼花睇漏可以好大件事，因拉布愈來愈常見，秘書處近日都拿拿聲打造秘密武器，研發咗一個「數人App」，以後秘書長陳維安同職員應付拉布點人數，唔使咁頭痕喇！
每次啲議員要求點人數時，秘書處議員就要即時停止手頭上嘅工作，逐一點算身處會議廳內嘅議員人數，等夠數就即時通知主席復會。但原本嘅做法就有啲麻煩，因為秘書處係搵人用印有議員座位表嘅紙張嚟數人，如果議員身處會議廳，秘書處職員就會喺座位表上有關議員名字隔籬剔一剔，代表該位議員在席。
記埋嗌點人次數
不過，呢個方法慢又兼顧唔到變化，譬如有議員喺響鐘期間無啦啦又行咗出去，職員又要劃走，個表好易剔到花晒，一個唔留神，分分鐘仲睇漏眼或數錯，咁秘書處又要孭鑊。
有見及此，秘書處最近就研發咗一個「數人App」，以後秘書處職員一拎起部平板電腦，就可以用「篤手機」嘅方式嚟「篤人頭」，比以前喺張紙上面劃來劃去方便同準確得多。嗰App除咗可以記錄議員開會情況，仲可以電子化咁記低「拉布」議員要求點人嘅時間同次數，咁秘書處以後就唔使怕會計錯數或點錯人頭喇。
第一手消息請下載on.cc東網
