近日，又有世界級嘅乜乜民調，話香港青年的「快樂指數」喺全球排尾三，梗係啦！呢度嘅社會管理層唔係靠謊言行騙為榮的，就係廢柴庸碌掌權的！由消防、平機會、三司十幾局，以至醫院、機管局、地政署（下刪三千字），有邊度唔出事的呢？叫人點笑得出？

香港啲人才，死Ｑ晒去邊呢？

本地首富話齋：「識嘢嘅人唔敢做，無料嘅人亂咁噏！」當大家抱住睇阿爺面口行事的心態，呢度又點會唔PK？

高鐵香港段繼早前被踢爆會延期完工後，依家又自爆造價一定超支，「預計」最少會額外多出六十五億大元，但被立法會鐵路事宜小組主席田北辰及交通事務委員會副主席范國威齊齊質疑「工程最終費用肯定唔止咁嘅數」，暗喻呢六十五億超支費，乃又係呃港人「攞住先」的假數。

當年（即二○一○年）之反高鐵運動，早已經預見今日醜陋情景的了！呢條咁嘅「短命路」，得嗰二十六公里（香港地段），建造費卻要七百幾十億元，成三十億一公里，由港人付款，咁又益了誰呢？香港人？哈哈！

當高鐵過咗深圳便要立刻撳掣煞車，否則，直隊落海都有份，咁嘅環境，其實有無必要嘥錢起大笨象項目呢？鼓吹工程嘅，除左毒土共之外，當然有着數落袋嘅建築商啦！佢哋合奏講到唔起高鐵，香港就會被邊緣化呀！好落後呀！好似家陣政改唔袋住先呢，就會死路一條咁！

查實，高鐵一定要能直插香港腹地，是個「政治考量」，此乃「主權統一」的政治問題，全國貫通的高鐵，怎可只能去到羅湖以北，不許直入「中國固有領土」的香港特區？面子攸關，使幾多錢，有幾多人起義反對，老子都要由北京搭高鐵直插香港，請大開中門吧！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps