城中鏡：商品大王羅傑斯變身點股聖手
「商品大王」羅傑斯睇貴金屬好似黃金走勢固然叻，多次估中黃金嘅大升浪以至大跌浪，可算係「點金聖手」。之不過，佢最新投資動向，竟然係港股，莫非佢要變身成「點股聖手」？
羅傑斯加盟首華財經網絡，帶挈隻股爆升。（資料圖片）
一向唔多講股市睇法嘅羅傑斯，竟然會加盟創業板股份首華財經網絡，帶挈隻股尋日升咗百分之二點六，至零點三九五元。但追查番之前啲相關新聞，原來上周二首華已透露跟羅傑斯傾緊，有意請佢做非執董，當天股份已暴升百分之九。今次公司正式發咗通告，建議委任羅傑斯擔任首華財經非執董以及深圳前海首華高級顧問，條件係該公司會向羅傑斯授出合共六千萬股股權，分開三年每年二千萬股授出。依家等緊公司股東特別大會及股東批准！
相信羅傑斯肯答應，當然要有着數先得！一般散戶無乜話事權啦，惟有跟風炒兩轉。不過，隻股升咗唔少，股友都要小心接火棒！
