土力工程處前處長陳健碩卸任香港工程師學會會長之後，由前高級副會長Victor張志剛接任。正所謂新人事新作風，Victor一上任就有新搞作，決定為個會製作首名為《天工》嘅會歌，仲搵著名嘅音樂人倫永亮同鄭國江幫手作曲同填詞，又製作埋音樂影片（MV），相當認真、專業。

張志剛吹色士風時，渾然忘我。（受訪者提供）

Victor話首歌主要係介紹工程師嘅成就同貢獻，下個月主題曲正式面世時，將號召六十個會員一齊大合唱，場面應該幾震撼。雖然Victor咁落力促成件事，但係話到時未必會唱埋一份喎！

唔講唔知，原來佢吹色士風好叻，副會長蔡健鴻就擅長彈結他，隨時可以一齊Jam歌。或者正因為學會內臥虎藏龍，所以先至咁有共識，諗到製作會歌娛人娛己啦！

第一手消息請下載on.cc東網iPhone/iPad/Android/Windows Phone Apps