城中鏡：抗疫防伊波拉 商界靠自己
西非爆發嘅世紀疫症伊波拉疑似襲港，全城人心惶惶，雖然最終證實係虛驚一場，但係政府至今仍未宣布防疫措施，商界一於自救防患未然。中華廠商聯合會副會長Shirley陳淑玲話已喺旗下時裝連鎖店提供洗手液，呼籲員工同客人勤洗手。另一副會長Eddy李秀恒直言二十年前已開始同尼日利亞做生意，疫情爆發後唔會斷絕同當地通商，但傾生意時會戴口罩及避免握手。
李秀恒喺二十年前就勇闖尼日利亞，開拓手錶市場。
陳淑玲（右）同吳永嘉齊邀請多位傑出華商分享成功故事。
廠商會常董史立德（左）同太太史顏景蓮鼓勵年輕一代延續港商的拚搏精神。
加強消毒 避免握手
廠商會尋日為推出電視特輯搞宣傳騷，話題離不開伊波拉驚魂。非洲市場巨大，唔少港商都喺東非經營鞋廠或製衣廠。Shirley話疫情現階段只影響西非，故暫時未收到受影響個案。但佢已打醒十二分精神，叫員工注意個人衞生，加強店內消毒。Eddy就自爆同「非商」打交道多年，二十年前已賣錶畀尼日利亞，伊波拉喺西非大播毒後，佢坦言唔驚得咁多：「唔少非洲水貨客定期嚟香港買手錶及電子產品，兩地交往頻繁，點驚得咁多？」
副會長吳宏斌都同埃塞俄比亞關係密切，佢係該國駐港名譽領事，多年前已進口當地咖啡豆喺香港銷售。佢直言以往不時飛往當地買貨，但近年業務轉型，打個電話落柯打就得，所以非洲爆發疫症都唔太擔心，期望疫情盡快平息。
講番個活動係廠商會八十周年慶祝節目之一，將推出十多集電視特輯，讓港人重溫香港工業界光輝歲月，了解港商如何面對挑戰。副會長吳永嘉亦粉墨登場細數工展會發展歷程，佢自爆為咗上鏡更靚仔，又要搽粉又要畫眉，但一畫眼線就狂流眼水，後來索性就唔畫喎！
