政壇：黃之鋒入公大讀政治
學民思潮召集人黃之鋒之前放風話自己中學文憑試成績達大學門檻，但因部分科目正等候覆核結果而拒絕透露大學聯招取錄結果，尋日終於確定覆核失敗，成績維持原判。佢喺社交網站自爆，文憑試攞到十九分，最後獲公開大學社會科學榮譽學士（政治及公共行政）學系取錄。
黃之鋒部分科目覆核失敗，文憑試攞到十九分。（資料圖片）
黃之鋒話自己從來唔係成績最頂尖嘅學生，大家唔使因為佢入咗公開大學而失望或者開心，正如佢喺放榜當日所言，「自己成績自己負責」，考到十九分對佢嚟講係不過不失，問心無愧。佢又話希望自己入學唔好累及其他公開大學嘅同學，唔好講咩「黃之鋒搞政治讀唔掂書最後咪要讀OU」，佢強調喺香港只有一成七考生能考入大學，做到大學生已經唔容易。公大校長黃玉山接受查詢時話，自己唔過問收生情況，仲叫大家畀啲空間黃之鋒喎！
