政壇：律師會兩陣營爆網戰
聽日律師會召開特別會員大會（EGM），處理三名會員Kevin任建峰、蔡家玲同吳少雲，向會長Ambrose林新強提出嘅不信任動議。
設計圖片及對白
特別會前爭授權票
支持同反對陣營近日除咗透過傳媒展開口水戰互數對方不是，加上互相發公開信爭取支持之外，原來亦有發動網絡大戰，分別喺社交網站開設群組宣傳自己立場，暫時雙方都攞到約一千個「like」（讚好），可謂旗鼓相當。
反林一方早喺上月中開咗個「Solicitors' EGM 2014 律師特別會員大會 2014」群組，截至尋晚有約一千個like。群組上載咗多篇相關報道同訪問片段，向會員發出嘅電郵等，最緊要嘅就係叫人提交支持動議嘅proxy（授權）票。Ambrose前晚再發信，話評論白皮書嘅立場同律師會理事會一致，擔心今次EGM係「泛政治化的端倪」，呼籲會員支持。
至於撐林一方亦不甘示弱，喺上月底都開咗「EGM 2014 for The Law Society」群組，至今有逾一千三百個like。群組上載咗佢哋嘅支持者信件，Ambrose喺記者會嘅發言同訪問原文等，最新仲有控告《蘋果日報》誹謗嘅入稟狀。好彩雙方留言嘅大多都係斯文人，暫時唔見粗口橫飛嘅網絡語言，不過專業人士興暗諷，有人喺反林群組留言「The TRUTH will prevail（真相最終會揭露）」，擺到明寸撐林群組上載嘅「The truth prevails」相集。
律師會尋日截止爭取proxy票，雙方都唔肯講手頭上有幾多票，睇嚟要聽日先知結果！
