潮語「無碼」，其實係指一啲冇打「格仔」嘅色情影片或網上視頻。事關呢啲色情影片，尤其係日本色情AV，通常都以「格仔」效果、又或稱為馬賽克「Mosaic」嚟遮住敏感部位。「無碼」，或港式粵語稱之為「無格」嘅影片，就係無遮無掩原汁原味露出所有性器部位，赤裸裸嘅色情影片。

自從七一有破紀錄人數上街遊行，學聯學民發動留守直至五百一十一人喺遮打道被捕後，本地好似冇乜大新聞。反而，外地新聞較令人關注。例如以巴衝突，造成大量巴勒斯坦平民受傷甚至死亡。同時，伊拉克嘅宗教內戰，亦係非常之殘酷慘烈。另外，一個禮拜內發生三單大型空難，亦令人相當痛心，尤其係馬航被地對空導彈擊落，到底責任誰屬，到今日仍然係一個謎。反觀香港，過去一段時間香港人好似已經忘記咗當日七一嘅憤怒同激情，大家依舊如常生活，繼續被資本家剝削而默不作聲。加上「張融」之流製造民意，搞埋啲咩「反佔中」簽名，香港人依然視而不見，任由小丑們日日上鏡。但近日最吸睛嘅，竟然係某女星嘅艷舞自拍淫片「無碼」流出。好多人替佢不值，亦有好多人鬧該女星係「新香港人」，根本不值得同情。不過，港人對呢啲名人「無碼」影片流出，似乎關心過影響自身未來嘅政改咯！

喺網上，好多時都會喺影片標題上寫明「無碼」AV，以刺激一眾好色網民下載觀賞。有些名人嘅淫片，亦會標示為「某某明星無碼流出」嚟吸引觀眾。至於今次嘅A片，亦係標示為「無碼」，即係佢呢條艷舞片，係赤裸裸嘅演出。據報呢段「無碼」片原來係為取悅愛人而自拍，到底點解會喺網上流出？可能連當事人都未必知。潮語「無碼」，其實應該寫為「無馬賽克」，不過可能網民認為「碼」較「馬」更有一種數碼感覺，故「無馬賽克」就變為「無碼」。

不過如果你問我該艷舞片有冇睇頭，我可以答你真係冇！第一，就算該女星穿衣與否，我都冇興趣。二就係，人哋調情，關你乜事？

第一手消息請下載on.cc東網iPhone/iPad/Android/Windows Phone Apps