SUN搞作：網絡小說：貪曾水蓋永不分

「黑白無常，同我拖條廢柴上嚟！」好一個貪曾雖然驚入冊，但係在任凸首時已經做慣老叔父，見慣江湖大場面，閻王殿上乜嘢三刀六眼、勾脷剁手都唔當係一回事，仲唔知仗住乜嘢狗威，見到閻王爺都唔肯下跪。

「貪曾，速速跪下聽審！」閻王爺大喝一聲，貪曾竟道：「我有功名在身，豈可下跪！」貪曾一手指住個鼻，一手揚起雀屎水蓋，好不神氣！閻王爺聞言冷笑道：「你呢個水蓋過晒有效期，仲攞出嚟耀武揚威？沒收！同我打！打！打！」鬼卒你一下我一下輪住上，貪曾除咗嗌停嗌唔好，已經諗唔到其他嘢。

好不容易捱過酷刑，貪曾正待遣返陽間，豈料閻王爺關心一問：「你係咪好留戀呢個雀屎榮譽？」貪曾急急點頭伸手要，閻王爺一聲嘆息：「將貪曾打落十八層地獄，同個雀屎水蓋一齊熔煉，永不分離！」