SUN搞作：少膽虫手記：一蚊人工
「肥豪，你哋成班有嘢唔做聚埋一堆，係咪想作反呀！」本虫向來鬧人當喝狗，從來唔留口，點之畀我見到成班食塞米都眼泛淚光，真係打咗個突，唔通我真係咁有料，兩句就可以鬧喊人？
「嗚……腦腫，不如減我哋人工啦，我哋口多身賤，頂得住o架！」但見肥豪圓圓眼睛流住圓圓眼淚，仲自請減人工，真係震撼過冧樓，一時三刻我都說不出話來。「虫哥，你知唔知腦細淫賤黎原來一年得一蚊人工，有啲人話佢平時食《爛果》廢紙當晚餐，有人仲話見到佢去堆填區食垃圾，真係慘！我哋成班諗住減啲人工幫吓佢，好嘛？」
唉，點解呢班豬咁蠢嘅人會係我下屬？有人話有人話，有人夠話平時遲到係畀外星人捉咗啦，咁又信？淫賤黎得一蚊人工？佢做一蚊人情我就信！呢啲咪就係語言偽術囉，虛晃兩招就搞到成班友自請減人工，好過殺人放火啦。「既然你哋咁有心，下個月人人減薪兩成，等腦細唔使再食垃圾！」成班豬玀歡呼一聲散去，而我肯定，以減薪懲罰愚蠢嘅決定絕對正確。
