政壇：哈山幫阿Ben參透印巴裔人生活

立法會議員陳恒鑌（Ben）近期請咗一位巴基斯坦籍、名為黃哈山嘅後生仔做實習生，幫佢處理地區上有關少數族裔嘅議題。阿Ben話，好彩得哈山幫手，佢先至知道印巴裔居民嘅生活習慣，例如依家係伊斯蘭教嘅齋戒月，唔少印巴裔人喺日落之前都唔可以進食，所以佢哋都要改為夜晚落區喎。

陳恒鑌請咗巴基斯坦籍嘅黃哈山做實習生，大讚好幫得手。

哈山話，佢已經幫阿Ben個黨做咗十幾年義工，喺上次立法會選舉認識阿Ben，覺得阿Ben好似一個好朋友咁值得信賴，加上佢有心服務區內同鄉，於是就決定喺阿Ben嘅葵青辦事處做實習生，依家會組織一眾鄉親喺暑假參觀立法會，暑假後就打算繼續讀書。