SUN奇古怪：【支那人】Zi1 Naa4 Jan4
「支那人」其實係一個已經作古嘅詞語，唔知點解近年又潮起上嚟，成為潮語，喺網上被廣泛使用。「支那人」其實就係指中國人，如果係以潮語所指，就係大陸人咁解，並非泛指所有華人。
上周一家大細避走泰國五日，遠離香港呢個是非之都高壓力城市。本來喺椰林樹影、海風忽悠嘅環境底下，可以將糾結嘅公務、沒完沒了嘅政治爭拗拋諸腦後，盡情同家人享受陽光海灘。然而，去到當地，雖然唔使打開電視見到啲膠官日日膠噏，但係始終逃唔過大量強國遊客喺泰國成群成群咁出沒，繼續向世界宣揚「中國式旅行文明」。咩叫「中國式旅行文明」我諗毋須再多費唇舌解釋，你只要走一轉廣東道或者去銅鑼灣時代廣場一帶，就可完全明白。所以有當地泰國人同我友善地以普通話講「你好」嘅時候，我亦會相當友善地用泰語回答佢哋：「Pom Mai Kon Jeen, Pom Kon Hong Kong !」，意思即係我唔係中國人，我係香港人。奇怪嘅係，當泰國人知道呢個真相之後，佢哋對我哋嘅服務態度就更友善更好！所以你話，「支那人」去到世界任何角落，都係咁不受歡迎。
潮語「支那人」係網民因為近期中港矛盾已去到一個分裂嘅地步，所以有啲人除咗叫大陸人「蝗蟲」之外，亦會稱呼大陸人為「支那人」，以傷害民族感情。因為，「支那人」係日本侵華時期，日本人對中國人嘅衊稱，帶有貶義。所以，有網民就用呢個喺日本戰敗後絕少採用嘅詞語嚟形容中國大陸人。但係原來實情係，「支那人」原來係孫中山先生都用嚟稱呼中國人，聞一多亦有一首詩，寫過「我是支那人」！喺上世紀初，清末民初，「支那人」係一種稱呼中國人嘅潮語！估唔到今時今日，過咗一個世紀，「支那人」又再重新成為潮語，但係意思就差天共地！
「支那人」喺幾時唔再係日本稱呼中國人嘅詞語？原來喺1946年，中國係二戰戰勝國，於是向聯合國提出要求日本不再用「支那人」，但係估唔到係新中國令「支那人」從歷史中復活。
