內地黑心食品攻港，快餐店初初仲話冇用內地公司嘅食材，點知原來講大話，喺去年七月同今年五月用過該內地公司嘅肉餅，仲全部用完，食署呢鋪真係後知後覺，依家先暫停所有該公司嘅食品進口香港，監管食物情況堪虞，李衞忍唔住搵食環署署長群群傾傾。

李衞：黑心食品搞到咁大鑊，我哋邊食邊傾……（李衞與群群一齊起筷食嘢。）

群群：唉，我都知，無諗過佢哋講大話啫。

李衞：鬼咩，你哋做嘢慢人一拍、又被動！

群群：依家咪補救囉，一刀切，唔畀間嘢嘅食材進口！

李衞：不過冇用啦，好多市民都食咗落肚！

群群：我都唔想o架……

李衞：呢件事反映抽驗內地進口食品機制存漏洞，你哋要好好正視！

群群：係啦，見過鬼仲唔怕黑咩！咦，係喎，你請我食呢啲係咩嚟o架？

李衞：哎呀，好似都係雞肉嚟喎，唔好意思，同你一樣，有少少後知後覺……

群群：#$^@#%^&%&!**呢啲嘢唔食得落肚o架！

第一手消息請下載on.cc東網iPhone/iPad/Android/Windows Phone Apps