話說行政署上星期突然宣布關閉政府總部東翼廣場進行加建圍欄工程後，人權組織同示威團體鬧爆工程係想阻止示威者去政總示威，又批評政府企圖以高牆隔絕民意，「門常開」變咗「門常關」。

設計圖片及對白

有政府官員透露，其實行政署早有計劃在東翼廣場加設圍欄，皆因經歷過兩年前反國民教育同舊年免費電視發牌風波，數以萬計示威者包圍政總，行政署深深感受到政總位置太過空曠，猶如無掩雞籠，根本無險可守。所以有政府中人建議行政署倣效位於上亞里畢道嘅舊政總咁加設圍欄，日後示威者只能喺申請後才能入內集會，大大減低出事嘅機會。

但據聞行政署署長蔡潔如諗唔到用乜嘢理由話要加設圍欄，於是等咗足足大半年，遇上反對新界東北發展示威者用暴力企圖闖入立法會，主席曾鈺成要聘請顧問公司諗計加強大樓保安，再加上立會休會放暑假兩個月，議員紛紛出埠去旅行，蔡潔如即時拍板封閉廣場起圍欄，博立會復會後米已成炊，議員就算鬧爆都改變唔到事實，呢次擺明係「博亂」喇！

議員涂謹申預料到政府有此一着，日前去信要求保安事務委員會召開特別會議，討論事件對公眾集會及遊行嘅影響。由於多數委員唔同意喺暑假舉行特別會議，所以委員會決定放埋暑假後先再算。不過，相關工程只係需時約一個月，所以立會喺復會再討論都係嘥氣。

第一手消息請下載on.cc東網iPhone/iPad/Android/Windows Phone Apps