早前都講過，立法會議員「田二少」田北辰一日內連環抱龍鳳孫榮升外公，尋日就大宴黨友食豬腳薑慶祝，主席葉劉淑儀更率先向「黨孫」派利是攞個好意頭！田二少全程笑到見牙唔見眼，但就大呻兩個女「唔睬佢」，冇聽佢話幫個孫改個代表田姓（Tien）嘅T字頭英文名，唔能夠延續田家改名「傳統」喎！

田北辰（右）首次派薑醋有啲手忙腳亂，幸得潘國山幫手。

田二少透露，長女個B仔英文名叫Asher，三女個B女就叫Jaime，但似乎唔係咁啱心水。佢話太太姓梁（Leung），所以當年生長女植恩（Lauren）、三女植鏘（Lavina）等四個仔女，都用代表梁姓嘅L字頭英文名，咁四個仔女英文名縮寫都叫「LT」，有齊兩夫婦姓氏喇。

嚟到呢一代，佢都希望乖孫英文名可以秉承呢個傳統，可惜兩個女都唔聽佢支笛，佢都冇符。

田二少初為外公，第一次派薑醋難免有啲手忙腳亂，年初由公民力量過檔任新民黨副主席嘅潘國山似乎相當熟手，開到聲話要幫田二少派薑醋！

第一手消息請下載on.cc東網iPhone/iPad/Android/Windows Phone Apps