政壇：fb股價急漲朱仔變肥豬仔
全球最大社交媒體公司facebook日前出爐嘅業績好靚仔，股價周四急漲百分之五點二，收報七十四點九八美元，打破咗三月時舊紀錄七十二點零三美元，帶挈創辦人朱克伯格身家水漲船高，呢回「朱仔」變「肥豬仔」囉。
朱克伯格
據彭博社億萬富豪指數顯示，佢身家單日進帳十六億美元，至二百三十三億美元（約二千五百九十七億港元），全球排名第十六位，壓過排名十七、十八位嘅Google兩位創辦人布林及佩奇，同埋二十位嘅亞馬遜舵手貝索斯。
講真fb股價上升已唔係新鮮事，股價喺過去十二個月漲升百分之一百八十三，成為標指成分股之冠，遠遠拋離Google期間嘅百分之七點五升幅，目前市值昂然邁向二千億美元大關。撰寫《The Facebook Effect》一書嘅作者David Kirkpatrick就話，「朱仔依家先至起步，相信他將成為全球最有錢嘅人。」
