政壇：湯振玲踩單車征服台灣
仁濟醫院海外學生會日前喺荃灣一間酒樓舉行長者活動，一眾名人子女趁暑假落手落腳做香蕉蛋糕兼派福袋畀長者，今年新加入仁濟嘅總理兼紀惠集團副主席廖偉麟表妹Jacqueline湯振玲亦有現身。咪睇Jacqueline咁纖瘦靚女，其實佢好鍾意戶外運動，早前踩單車成功挑戰台灣公路最高點武嶺，相信唔少男士都自嘆不如。
湯振玲成功登上武嶺，開心到極。（受訪者提供）
Jacqueline笑笑口話，佢迷上踩單車兩年幾，屋企人就擔心兩年幾，其實只要做足安全措施，踩單車係好安全嘅運動。好多單車迷都鍾意去台灣玩，佢亦唔例外，去年參加咗環台遊，今年就由台中埔里踩上三千二百幾米高嘅武嶺，期間遇上大雨，極具挑戰性，佢用咗六小時踩上清境農場，再用四小時踩上武嶺，稱得上係女鐵人。雖然過程好辛苦，但係相當有成功感。
