壹傳媒老闆肥佬黎同多個泛民政團、現任及前任立法會議員牽涉嘅政治獻金醜聞未解決，捲入風波嘅公文袋毛孟靜同陳淑莊、白鴿黨「阿涂」涂謹申都死口唔認收過肥佬黎捐款，但又「龜縮」唔敢追究或要求對方澄清。向來語出驚人嘅白鴿黨「一舊雲」黃碧雲尋日再有新猷，批評香港麥當勞入口過期肉類時，提到啲跨國企業「打開電腦，一撳就全部資訊出晒嚟啦」，呢個方法真係啱晒執法部門用嚟調查肥佬黎嘅政治獻金醜聞。

設計圖片及對白

只怕肥佬黎唔敢開電腦

身兼立法會食物安全及環境衞生事務委員會主席嘅一舊雲尋日接受電台節目訪問時，炮轟麥當勞以「訊息混亂」為知情不報作擋箭牌，直言麥當勞作為跨國企業，食品有冇問題「打開電腦，一撳就全部資訊出晒嚟啦」，嘲諷有關機構唔知走咗去開電腦定開雪櫃檢查，認真唔專業咁話。

咦！其實要解決肥佬黎同泛民議員之間嘅政治獻金醜聞，壹傳媒作為香港上市企業，要知道老闆有冇向泛民人士捐錢，理應一樣可以打開電腦撳個掣，全部資料就出晒嚟啦，大家唔使再口同鼻拗嘞，加上肥佬黎次次捐錢死都要攞番張收據，怕就怕肥佬黎唔敢開電腦、執法部門唔敢上門調查咋！

對於有團體要求立法會引用《立法會（權力及特權）條例》成立專責委員會徹查呢宗政治獻金醜聞，議員田北辰就有獨到見解，佢批評泛民過去動輒引用特權法調查呢個嗰個係浪費公帑，個人唔贊同透過立法會調查今次醜聞，但如果聲稱被屈嘅阿涂同毛孟靜想「還自己清白」，不惜動議透過特權法「自己查自己」，佢為玉成其事，一定會幫到底按贊成掣喎！有田北辰支持，兩位議員可以諗諗佢喎，唔係驚查出真相吓嘛？

第一手消息請下載on.cc東網iPhone/iPad/Android/Windows Phone Apps