四洲太子女Kennis戴凱欣最近同黃宗澤及幾個友人開甜品店，隨即同黃宗澤傳出緋聞，Kennis對此大感無奈，佢話：「我同佢唔係好熟，唔知點解會有咁嘅緋聞，佢係我哋甜品店其中一個partner嘅朋友，partner搵佢入股，依家甜品店試業咗兩個月，我都未見過佢。」咁如果見到黃宗澤會唔會尷尬？佢話：「都未見到唔知會點，惟有到時同佢say Hi時，話『Hello，緋聞男友』哈哈！」再追問想唔想快啲搵番個男友避緋聞？佢就話：「我都希望，至於擇偶條件其實我冇乜特別要求，我都平易近人，但緣分嘅嘢要順其自然。」

戴凱欣對擇偶冇乜特別要求，又話緣分嘅嘢要順其自然。

Kennis透露開甜品店完全係機緣巧合，又話：「我一直都想開食肆，突然有朋友問有冇興趣開甜品店，而且喺九龍城區。我之前都一路喺嗰度睇緊舖，於是就一拍即合，同埋覺得香港人好鍾意食甜品，都想做啲得意同有創意嘅甜品。我由細到大都慣咗試食，因為屋企有餐廳有開零食，試得太多，所以好多食試食都只食少少，食個味，唔敢食太多。」

第一手消息請下載on.cc東網iPhone/iPad/Android/Windows Phone Apps