香港政局從未有如此混亂過，即使六七暴動時，港英政府面對的，只是「左仔」單一暴徒群組，怎似得家陣圈內圈外層層撕裂，唔好話黨友盟友，分不清是人是鬼，就算家裏枕邊人，都唔知佢失驚無神會有乜上身，跳出嚟噏乜？全不受控制。

現今，坊間瀰漫着一股怪異詭譎的氣氛，像山雨欲來前的翳焗，大家屏息靜氣，等待那一觸即發之決戰似的！

香港政務司司長林鄭月娥上星期四晚，突然通知立法會，要喺今日舉行特別內會，交代政改諮詢報告，而特首亦同時向人大常委提交報告內容，這舉措十分不尋常，因至五月初，政府收到十三萬多份市民建議書，點可能喺這兩個月（六十日內）睇得晒、理順分析、仔細研究，才寫報告呢？難怪連愛國的十三位學者也聯署喊停，建議特首十月立法會復會後，才向人大提交報告，理由係要畀社會有更多時間「凝聚共識」，咁即係林鄭可公布他們「一錘定音」的「原裝劇本」，但也該讓市民聽過後，得悉乜東東，討論吓都得啩！使唔使急得咁無商無量，直接呈交畀佢哋嘅阿爺「邀功」呀！

唔好話香港市民反感，學生也揚言若人大常委一意孤行扼殺真普選，佢哋就會發動佔中、罷工罷課，到時，就唔知點收科矣！

七一咁多人上街，大陸北官都話唔理有幾多人不滿，都唔會改變佢哋對政改的方針計劃，咁又搞咁多諮詢大龍鳳把屁咩！香港廢柴政府聯同西環一直趁京城政局不穩，正在爭權清黨，無暇關顧失色的東方之珠之際，更乘機上下其手，有風駛盡！話之你港人媽媽聲吖！此乃亂之根源也！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東網iPhone/iPad/Android/Windows Phone Apps