政壇：搞搞政：吳得掂漏報公司 搞收檔拖足兩年

雖然吳得掂遲遲未摺埋間顧問公司，但同時就喺今次更新中申報多兩項利益，包括成為咗九龍木球會會員同某鄉村俱樂部嘅附屬會員，反映有大把空閒時間，並非因為太忙而搞唔掂間顧問公司。

問責官員「樓王」繼續係勞工及福利局局長張建宗，擁有嘅物業數目由舊年中嘅八個輕微增至九個，新增物業係位於東區嘅一個未落成住宅單位，由妻子擁有。喺行會非官守成員當中，李國章蟬聯「樓王」，擁有多達四十個物業同車位，物業遍布英國、香港島同新界多個地區。

陳茂波連太太儲物格都申報

至於特首梁振英同政務司司長林鄭月娥嘅利益申報，亦同舊年相差無幾，唯獨係林鄭喺英國劍橋嘅兩個單位，一個自己出租轉咗做由配偶持有及出租，另一個就由自住轉咗做空置，唔知係咪打算用埋嚟收租賺英鎊。

前後被指「囤地」同經營劏房嘅發展局局長陳茂波，申報咗佢太太許步明喺澳洲雪梨，新增咗一個儲物格用作出租。佢連太太遠喺彼邦嘅儲物格都申報埋，睇嚟真係見過鬼都怕黑，驚死再畀人話佢有利益衝突或漏報利益。