政壇：毅德國際主席 「人間蒸發」
人間蒸發古仔，間唔中會喺新聞出現，上市唔夠一年嘅毅德國際亦有疑似個案，毅德國際尋日就發公告，指足足有兩個星期唔能夠同主席兼執董王再興取得聯繫，連公司行政總裁、王再興個仔王德文都唔知老竇去咗邊，又上演一齣尋親記。
日常營運交兒子負責
毅德事件令人憶起經歷唔少是是非非嘅雅天妮前主席謝超群，都試過同前妻葉英琴失去聯絡。創辦雅天妮嘅呢對夫妻早兩年突然爆出連串負面消息，最初話謝超群因健康問題需要休息，到雅天妮宣布有十日未能與謝超群接觸，要委任葉英琴接手管理職權，至今兩人終告全身而退，由謝氏胞弟謝海州接任主席兼行政總裁，都曾令股海幾許翻波。
今次輪到商貿物流股毅德主席暫時失蹤，相信上任行政總裁兩個月嘅王德文都幾唔得閒，雖然毅德目前業務及運營正常，日常業務運營及管理主要交由阿仔王德文領導嘅高級管理團隊負責，但王德文都要聯同班高級管理團隊主持大局，依家仲諗緊過渡措施。睇嚟毅德基礎投資者之一聯想控股旗下弘毅投資，身為第二大股東，都應該幫手出多少人力物力尋人喎！
