東網電視
更多新聞短片中學文憑試尋日放榜，學民思潮召集人黃之鋒同發言人周庭都係應屆考生，自然多人關心佢哋能否升讀大學，其中周庭早上拎到放榜成績後就大方對外公布考到二十二分，透露準備報讀同社會科學相關嘅大學課程，至於黃之鋒就一直神神秘秘，唔肯鬆口講自己有幾多分。
黃之鋒（右）同周庭開記者會公布放榜成績，但黃之鋒唔肯透露考到幾多分。
及至下午時分，黃之鋒先同周庭一齊開記者會，正當大家以為黃之鋒會公布成績表時，佢只係肯講喺中文科考獲4級，當中嘅「會話」同「聆聽」部分考獲5**，通識科就考獲5級，其他的科目就以要覆核成績為由，暫時唔公布。
黃之鋒話唔知自己嘅分數入唔入到大學，不過同老師商量後決定報讀城市大學公共行政管理學系嘅副學士課程，並已獲取錄，又唔肯評論參與社會運動對成績有冇影響，強調每個人都有自己嘅興趣同選擇，佢只係參加同一般學生唔同嘅活動，希望外界唔好「一竹篙打一船人」，認定所有參與社運嘅學生成績都唔會好喎！
第一手消息請下載on.cc東網
