政壇：翟少做能源諮委有排忙
政府尋日宣布身兼房屋委員會財務小組委員會主席嘅蘇偉文，冧莊出任能源諮詢委員會主席，另外又委任五名新成員加入，包括剛卸任監警會主席嘅資深大律師「翟少」翟紹唐、會計師公會前會長趙麗娟、國際環保團體氣候組織大中華區副總裁（戰略夥伴）馬啟智等人，任期兩年。
翟紹唐
由於能源諮詢委員會要就電力市場發展、發電燃料組合等等議題提供意見，牽涉廣大市民利益，翟少等人獲委任加入，相信到時要幫手「拆彈」，加上翟少本身做緊最低工資委員會主席，勞資雙方正就法定最低工資水平討價還價中，料翟少未來半年都會周身都唔得閒嘞！
政府同日又宣布，委任機管局主席羅康瑞同工聯會立法會議員麥美娟二人為大嶼山發展諮詢委員會新成員，任期直至一六年一月底。仲記得政府喺今年初公布呢個委員會嘅成員名單時，建仔、新界社團聯會等建制派都榜上有名，相反只有工聯會無份，當時工聯會中人都心中有氣，事隔大半年後，麥美娟終於有份獲委任，似乎「補鑊」味道甚濃。
