政壇：林健鋒掌機場保安公司
身兼行政會議及立法會議員嘅林健鋒，最近接連獲政府委任重要公職，繼早前獲政府續任盛事基金評審委員會主席後，最近又被委任為機場保安有限公司主席，換言之，佢以後就要金睛火眼睇實同機場保安有關嘅事宜喇。仲記得早前爆出時任機場保安行政總裁周富祥擅自申領「補水」幾十萬元醜聞，唔知林健鋒上場後諗住點樣撥亂反正呢？
林健鋒
有知情人士話，過去多年機場保安主席一職都係由機管局主席兼任，底因係呢個職位知悉好多涉及機場嘅敏感資料，點都要搵個信得過嘅人出任。由於前行政會議成員張建東早前以私人理由，一併在以上兩個職位退下火線，因此呢個職位一直懸空。
按照過去不成文規例，機場保安主席理應由上月接掌機管局主席嘅羅康瑞接手，但據聞對方覺得機場保安主席呢個位太花時間同精力，加上自己只係出任機管局主席一年，因此屬意「唐營」嘅林健鋒接手機場保安呢個重任，不過責任愈大要承擔嘅工作也愈多，如果未來有乜涉及機場事宜嘅差錯，佢就好難置身事外嘞！
