話說立法會醫學界議員「怪醫」梁家騮幾日前一家大細遊數碼港，點知當佢哋打算走嘅時候，眼前嘅玻璃突然破裂，而喺怪醫對面、正準備入商場嘅一個中年男子就不幸被玻璃割傷流血。雖然怪醫因而鬆一口氣，但佢都即時發揮醫者父母心嘅本色，幫助該名男子止血，然後再打電話報警求助。

數碼港商場玻璃早前突然破裂，工作人員用索帶圍起以策安全。

「怪醫」梁家騮。

正所謂「有圖有真相」，怪醫嘅太太尋日喺社交網站上載幾張相，將呢個意外場面圖文並茂呈現大家眼前。怪醫太太憶述佢哋當時分兩批離開數碼港，其中一個小朋友同菲傭率先走咗出去，佢為咗將最細嘅囡囡放喺BB車上面，所以就遲咗幾秒出去，因而避過一劫，不過囡囡就嚇到喊。

有唔少怪醫太太嘅朋友知悉事件後紛紛留言慰問，並呼籲佢哋向商場方面索取賠償，不過怪醫太太似乎抱住多一事不如少一事嘅態度，話覺得唔需要喇！

第一手消息請下載on.cc東網iPhone/iPad/Android/Windows Phone Apps