設計圖片及對白
上次嘅立法會答問大會，有激進泛民主派嘅議員掟嘢，而一眾泛民議員更衝晒出座位包圍特首舉牌示威，原因之一係佢哋早已喺之前嘅答問大會用晒啲提問配額，好難再有機會被點中發問，惟有靠衝出座位博曝光。類似場面可能會喺今日下午嘅內務委員會政改報告特別會議重演，因為班泛民議員又係十居其九都冇機會提問，唔搞嘢就冇機會見報，政改三小組真係要小心啲喇！
今日嘅特別內會只得兩粒鐘，估計政改三小組起碼要用半粒鐘介紹報告內容，加埋可能有人示威、掟嘢同提出規程問題等，可能得番個多小時提問。根據過往會議嘅經驗，可能只夠約十名議員提問。
得涂謹申有機會發言
睇番六十九名議員喺過往特別內會嘅提問紀錄，一共有十一名議員從未問過問題，照計可獲優先發問，其中十人都係建制派，包括梁美芬、梁家騮、黃國健、謝偉俊、何俊賢、馬逢國、蔣麗芸、鍾國斌及鍾樹根，而泛民只得白鴿黨涂謹申一個，如果主席梁君彥執正嚟做，泛民實冇乜機會問嘢。
喺咁嘅形勢下，可以預料經常喺議事廳掟嘢嘅激進泛民，包括社民連嘅「長毛」梁國雄、人民力量嘅「大舊」陳偉業同「慢必」陳志全等勢必玩嘢。
唔知係咪因為呢個原因，泛民「飯盒會」二十三名議員尋日就率先去信政務司司長林鄭月娥，聲稱唔夠時間發表意見，建議下星期一政制事務委員會增加議程，或另行安排會議，要求三人組嚟解畫。
不過，政制事務委員會主席譚耀宗就話，泛民要二揀一，下周一會議傾政改報告，就唔可以傾白皮書喇，反正叫香港官員解白皮書，都真係為難佢哋。
第一手消息請下載on.cc東網
