生活成本節節升 衣食住行樣樣難

呢嗱，美國一間人力資源顧問公司日前公布環球生活成本指數，香港比舊年跳升三級，全球排名第三，連東京、倫敦、紐約、巴黎都望塵莫及，而前兩名都係非洲城市。呢項指數係針對外籍人士喺當地嘅生活成本而制訂，排名愈高，顯示消費開支愈高，香港呢次打入三甲，幾乎同非洲城市睇齊，證明香港愈來愈似第三世界。

即係咁，本地嘅外籍人士通常屬於高消費群體，消費高於本地居民一啲都唔出奇，所以呢項排名未必可以百分百反映本地嘅生活成本。不過咁，見微知著，呢項排名某程度上已可以反映香港百物騰貴，市民生活艱難嘅客觀現實。試諗吓，連高收入嘅外籍人士都感覺到物價昂貴，港人面對嘅生活壓力又點會低吖？

係人都知，香港生活指數高企，搵食艱難，基層市民簡直苦不堪言。表面上通脹率唔算好高，而且失業率低，幾乎全民就業添，弊在近年物價升得最勁最頻密嘅，就係同民生息息相關嘅衣食住行各項開支，柴米油鹽、公共交通幾乎年年都加。近年多項國際調查都發現，香港係全球生活費最昂貴城市之一，大部分打工仔收入追唔上通脹，生活質素不升反降，問你點頂？

正所謂，安居至能樂業，可惜呢點正正係港人嘅最痛。由於港府施政失誤，房屋供應嚴重不足，樓價同租金不斷飆升，令香港唔止成為全球生活費最貴城市之一，亦係全球營商成本最高地區之一，喺咁嘅情況下，無殼蝸牛固然望樓興嘆，中小企業更加係慘淡經營，賺賺埋埋都唔夠交租，講起真係可悲。

呢，本報早前調查發現，喺衣食住行中，香港同澳門、深圳、台北、日本及新加坡等鄰近地區相比，除咗食嘅方面平些少之外，其他方面都跑贏人哋成條街，尤其係住屋開支更加係一枝獨秀。有小本經營嘅店舖不堪舖租同生活開支不斷飆升，唔止轉戰深圳，索性搬埋上去住添。唔怪得最近一項調查發現，本港消費者信心指數首次喺兩岸四地敬陪末席，對經濟發展嘅信心更創下一年來最低。一葉知秋，港人對消費失去信心，其實係對港府失去信心，亦係對未來嘅經濟及社會冇晒希望。

所以話，一個地方嘅沉淪真係有迹可尋o架。今日香港經濟低迷，民生凋敝，加上政治爭拗不斷，跛腳政府寸步難行，想唔死都幾難喇，叮！