潮語「Kamcholia」表面上好似係英文，咪以為同末代皇帝溥儀當年嘅傀儡政權偽滿洲國有關。但係呢個「Kamcholia」實係廣東話嘅英文譯音，呢個潮語嘅發音係Kam-Cho-li-a，廣東話就即係「監粗嚟呀」!意思好明顯就係形容啲嘢，唔理人感受，唔理人同唔同意反唔反對，總之監粗強行去做，呢啲就叫做「Kamcholia」。

警務處處長曾偉雄被問到，有關良心嘅問題。佢竟然反問良心到底係乜？仲話良心係好危險嘅事，因為你嘅良心同佢嘅良心都唔一樣。首先，我唔知原來良心係好危險，更唔知良心點解咁危險。第二，我更唔明白點解佢嘅良心唔同我嘅良心。禿鷹處長呢番說話，我嘅解讀就只係佢質疑緊「良心到底幾錢一斤？」。唔怪得之佢做咗處長之後，警隊可以用「黑影」阻擋鏡頭，又可以連着「平反六四」Tee嘅市民都要抬走。當然唔少得嘅係，通緝可以delay兩年先拉人。最近警方仲空群而出，拘捕和平示威者同社運人士。將來真係佔中，呢位唔知良心為何物嘅處長，分分鐘會開槍都唔定!連執法機構最高辦事人，都可以視良心為無物，可見現屆政府樣樣嘢都係漠視民意，甚至不惜與民為敵都要「Kamcholia」硬上弓。作為香港人，感覺真係好似日日被輪姦！

至於點解「監粗」要喺「監粗」後面加個「lia」?應該係純粹貪過癮，好多時有啲字都會無端端加啲英文字喺尾，例如依家好多人鍾意咩都加個「ing」喺尾嚟代表「現在進行式」，例如「期待緊」會變成「期待ing」。又例如有啲人會加「ism」喺尾代表一門學問，例如「媾女學」會變「媾女ism」。所以，「監粗」就變咗「監粗lia」，而好似政府一啲人鍾意「監粗」強姦民意嘅人，可以稱為「Kamcholian」，即係「監粗嚟嘅人」。

除咗禿鷹處長外，最近最離譜嘅「Kamcholian」非「唔亮星」莫屬。呢啲人可以完全漠視議會規則，監粗表決法案，完全體現黨性大過人性。嚟緊政改，特衰政府又唔知會提啲咩垃圾方案，「Kamcholia」要香港人接受!到時香港人會否奮起反抗?我真係「期待ing」……

第一手消息請下載on.cc東網iPhone/iPad/Android/Windows Phone Apps