設計圖片及對白
若果冇乜突發事件發生，立法會財務委員會今日召開本年度最後一次會議，而主席「星爺」吳亮星嘅主席生涯亦係最後一日。不過，星爺臨落莊都惹來爭議，據聞有人喺前廳見到星爺同飯盒會召集人KK馮檢基傾到攬頭攬頸，星爺之後又公開向傳媒透露，會向政府反映泛民主派提出調動議程嘅建議，搞到建制派中人以為星爺同泛民打龍通。其後證實星爺冇咁做，事件反映建制派對星爺嘅信任度已近乎零。
KK證實星爺當日根本就冇作出任何承諾，只係話會如實向政府反映泛民嘅意見，所以建制派有呢個「美麗的誤會」，完全係因為同星爺溝通不足所致，甚至對星爺失去信心。如果建制派真係咁諗，確實有啲多餘同過慮，事關星爺做事唔係要向建制派交代，如果星爺咁大膽臨尾「玩鋪勁」，相信佢都要向其他方面有所交代。
另外，財委會尋日討論撥款十五億元畀環境局興建廚餘回收中心，但人民力量陳偉業提出中止待續議案，星爺及後按程序要求大家先舉手表決，人民力量、白鴿黨同工聯會舉手支持，工黨、公共專業聯盟同謝偉銓反對，建仔幾個成員就坐喺度冇投票，令議案以七票對五票獲得通過。星爺見到咁嘅投票結果，都嚇咗一跳，以為自己睇錯，「彈弓手」叫人舉多次手確認投票，但結果依然無變。
第一手消息請下載on.cc東網
