政壇：「神奇小子」入港交所
港交所尋日公布新一批上市委員會名單，換入五名新成員，其中最矚目應該係引入有「神奇小子」之稱嘅Janchor Partners創始人兼投資總監何志安（John Ho）做上市委員。
唔知何志安會唔會為上市委員會帶來火花？（資料圖片）
年僅三十七歲嘅阿John，喺金融界已大有名堂。佢創立Janchor Partners前，曾任兒童投資基金（TCI）香港辦事處嘅亞洲投資部門主管，更加曾經代表TCI加入領匯做非執行董事。佢離開TCI後自立門戶，成立對沖基金Janchor Partners Pan Asian Fund，成立首年就以百分之三十五回報成為十年來其中一隻最賺錢嘅對沖基金，投資者排住隊認購，令佢喺行內聲名大噪！
今次佢被邀請加入上市委員會，唔知會唔會為上市委員會帶來火花？尤其係下月上市委員會將召開最新季度政策會議，或會為備受市場爭議的「同股不同權」架構諮詢作最後拍板，唔知「神奇小子」點睇呢？
