鄭錦鐘連夜通宵睇波，太太鄭關巧妍煲定老火湯畀佢降火。
「大力神杯」係由德國抑或阿根廷捧走，掀起城中熱話。保良局尋日舉行一年一度關帝寶誕祭祀禮，一眾成員同多位前主席誠心上香，又切燒豬祈求香港太平。拜完神之後，燒豬即切即食，前主席Eric鄭錦鐘就拉埋同樣愛好睇波嘅總理Daniel陳正欣，一邊歎熱辣辣燒肉，一邊大講波經。
陳正欣（左）把握開波前嘅空檔傾生意，效率認真高。旁為總理顧東華。
Eric讚賞德國隊有團隊精神，組織力強，恍如一支軍隊向前進攻，無堅不摧。相反巴西隊只着重個人技術，欠缺「冠軍相」，所以最終投德國一票。Daniel都話有同感，所以對巴西落敗不感訝異，只係唔明一支南美勁旅點解可以輸得咁離譜。
講到通宵睇波，Daniel話平時習慣夜瞓，通頂無難度，加上佢啲歐洲客人都係球迷，大家協議趁開波前快手傾完生意，效率反而高咗。
近日有球迷買到假嘅世界盃門券，損失數萬元。Eric同Daniel都話未聽聞有人兜售決賽門券，Daniel笑言有飛都唔會去睇，事關巴西治安麻麻哋。Eric就話團費要成十幾萬元，不如買紅酒飲吓好過。
第一手消息請下載on.cc東網
