方國珊「血水」淋頭，寓意血濃於水，反對擴建將軍澳堆填區。
立法會財務委員會今日加開會議，審議包括將軍澳堆填區擴建計劃在內嘅撥款申請，但反對計劃嘅西貢區區議員「哪吒」方國珊，尋日就率先到立法會外抗議，以「血水」淋頭，話市民「血濃於水」，又聲稱已經有多位喺堆填區工作嘅環保署人員患癌，都唔知係咪同堆填區有關喎，批評政府唔應該犧牲市民嘅健康，去擴建堆填區。
哪吒話政府堅持擴建堆填區嘅話，就等同謀殺市民生命。為咗反對擴建將軍澳堆填區，哪吒海又跳過，絕食又試過，所以今次要升級用「血水」以表佢抗爭到底嘅決心喎。
不過，哪吒嘅「血水」道具都算幾逼真，問佢點樣炮製呢壇血腥場面啦，佢就話要先用洛神花煲水，再加番啲紅麴粉，咁就夠晒血紅色啦！
不過，財委會只剩下今日八小時會議，會否趕及審議堆填區撥款都係未知之數，哪吒「血水」都出埋，下次仲可以玩啲乜呢？佢就話到時先算，但今日佢就會喺將軍澳搞大遊行，要同街坊一齊保衞家園咁話。
第一手消息請下載on.cc東網
