政壇：梁繼昌傻強 辣到飛走

議員排住隊抖暑

原來一切都係美麗的誤會！其實陳家強今年初榮升老爺，大仔David陳漢唐迎娶韓籍新抱Dina Shin，但佢哋兩公婆因為工作關係，移居紐約，所以陳家強幾個星期前，就決定咗同老婆飛去紐約探仔同新抱，但冇諗到時間夾得啱啱好。

講起會期接近完結，除咗官員放假，唔少議員都排住隊抖暑，尋日先講完建制派嘅葉國謙懶理幫政府為辣招護航，會飛去巴西睇世界盃，但勢估唔到，最快嗰個竟然係會計界議員梁繼昌，今日凌晨就飛走。

乜佢唔係要提豁免三年自用工商舖嘅修正案咩？仲話要游說多啲黨派支持修訂喎，竟然撒手不管？梁繼昌話呢次去芬蘭，全因出席公司商務會議，本來個會議就由同事去，點知對方臨時唔得閒，佢惟有頂硬上，最快都要一個星期後先返港。

咁佢個修正案點算？原來梁繼昌已經搵咗公共專業聯盟自己友莫乃光代勞，前晚入紙代佢提修正案。雖然修正案可以搵人提，但票就唔可以搵人代投喇。佢坦言，依家功能界別夠票通過，所以佢嗰一票未必太重要，反而地區直選仲差幾票，所以游說緊幾個小型泛民政黨支持。不過，冇佢親自拉票，睇嚟結果隨時會事倍功半喎！